Bu gün Bakıda müxtəlif ölkələrdən olan gənc mütəxəssisləri bir araya gətirən “UrbanVisions” Beynəlxalq Gənclər Forumu işinə başlayıb. Forum iştirakçılara şəhərsalma sahəsində bilik və bacarıqlarını nümayiş etdirmək, eləcə də həmkarları ilə təcrübə mübadiləsi aparmaq üçün unikal imkan yaradır.

Forumun proqramı şəhərsalma, memarlıq və inşaat sahələrində tətbiq olunan innovativ yanaşmalara həsr olunmuş panel müzakirələri, həmçinin iştirakçılar üçün nəzərdə tutulan praktiki təlimləri əhatə edir.

Bundan əlavə, qarşıdakı günlərdə iştirakçılar Bakı şəhərinin Baş Planı əsasında planlaşdırılan ərazi üzrə komanda şəklində layihələr təqdim edəcək və bu layihələrin müsabiqəsi keçiriləcək. Bu, gənc mütəxəssislərə şəhər mühitinin inkişafına öz töhfələrini vermək üçün bir fürsətdir.

Qeyd edək ki, forum Gənclər və İdman Nazirliyinin dəstəyi və Gənclər Təşkilatları Milli Şurasının təşkilatçılığı ilə keçirilir və dekabrın 8-dək davam edəcək.